Физикалық-математикалық бағыттағы Назарбаев Зияткерлік мектебімен жаңартылған білім мазмұнын жүзеге асыру мақсатында 2017 жылдан басталған 3,4 курс студенттерін тағылымдамадан өткізуге арналған «Үйрен-бөліс» жобасы биыл да жүзеге асырылып отыр.
Соған орай бүгін Жұбанов университетінде Елбасының Жастар жылына орай «Студент-түлек-маман» республикалық форумы аясында «Үйрен-бөліс» оқу кабинеті ашылды. Аталмыш кабинет университеттің физика-математика факультетінде қолданысқа берілді. Жиынға университет проректорлары, факультеттің профессорлық-оқытушылық құрамы мен студенттері, Назарбаев Зияткерлік мектебінің мұғалімдері және мектеп директоры Сабыржан Сәдуақасов қатысты.
Кабинеттің ашылуында ректор Бауыржан Ердембеков университеттегі тың жаңалықтарды атап өте келе, «Үйрен-бөліс» оқу кабинетінің ашылуы символикалық жағынан республикалық форумның нәтижелі жұмыстарының бірі екендігін тілге тиек етті.
«Математика» мамандығының 3-курс студенті Гаухар Оразбақова «Үйрен-бөліс» оқу кабинетінің жұмысымен таныстырып, жаңартылған білім мазмұнының ерекшеліктері туралы баяндады.
Жиын қорытындысында декан Алтыншаш Упуқызы Бекбауова факультет студенттері үшін әдістемелік кабинет болатынын жеткізді.