Q.Jubanov atyndaǵy Aqtóbe óńirlik memlekettik ýnıversıtetinde «Men óz mamandyǵymnyń sheberi bolý arqyly mansabyma qol jetkizemin!» devızindegi «Stýdent-Túlek-Maman» respýblıkalyq forýmy ótti. Respýblıkalyq forým Elbasynyń «Jastar jyly» aıasynda Qazaqstan jastaryna sapaly bilim berý men bilikti maman daıyndaý, jastardy jumyspen qamtý jáne dýáldi bilim berý máselelerine arnaldy.
Atalmysh sharaǵa Qazaqstannyń 12 joǵary oqý oryndarynyń ókilderi, Nazarbaev Zıatkerlik mektebiniń muǵalimderi, óndiristik kásiporyndar, oblystyq jáne qala ákimdiginiń basshylary qatysty.
Forým qonaqtary aldymen Q.Jubanov atyndaǵy Aqtóbe óńirlik memlekettik ýnıversıtetindegi stýdentterge arnalǵan oqý ortalyqtarynyń jumysymen tanysyp, ýnıversıtet stýdentteriniń ǵylymı jetistikter kórmesin tamashalady.
Forýmnyń ashylýynda «Qurmetti qonaqtar, áriptester, stýdentter! Búgingi zamannyń eń kókeıkesti taqyryptarynyń biri de, biregeıi — qazaq eliniń sapaly mamandaryn túletý bolsa, sol taqyrypty negiz etip otyrǵan otyrǵan búgingi «Stýdent-túlek-maman» atty respýblıkalyq forýmǵa qosh keldińizder!», — dedi Q.Jubanov atyndaǵy Aqtóbe óńirlik memlekettik ýnıversıtetiniń rektory Baýyrjan Erdembekov.
«El bolashaǵy jastar bolsa, sol jastardyń jaqsy maman bolýy dál búgingi kúni, qazaq eli úshin aýadaı qajet qubylys. Al, sol jas maman óz eliniń ultany bolar, qazaǵyn súıer qyz bolyp qalyptassa, táýelsiz eldiń kók baıraǵy máńgilik jelbireıtini sózsiz. Sol sebepti de, bizdiń qarashańyraqtyń kire berisinde ál-Farabıdiń myna bir sózi teginnen tegin jazylyp turǵan joq: «Tárbıesiz berilgen bilim, ol –adamzattyń qas jaýy». Demek, biz maman daıyndaýdan buryn kisilik qasıetti boıyna jınaǵan adam qalyptastyrýymyz kerek. Sol jaqsy adamnan maman shyǵarsaq, ýnıversıtet mıssıasynyń oryndalǵany», — degen ýnıversıtet basshysy jastarǵa mamandyq tańdaýda qatelespese, sol jolda tynbaı eńbek etken adam bıik belesterdi baǵyndyryp, el qurmetine bólenetinin jetkizdi.
Ýnıversıtet basshynyń aıtýynsha, qazirgi kezde Q.Jubanov atyndaǵy Aqtóbe óńirlik memlekettik ýnıversıteti bilim berý jáne óndiristik uıymdarymen tyǵyz baılanys ornatqan. Ýnıversıtettiń 40-qa jýyq túlegi dýaldy bilim alǵan. Yntymaqtastyq nátıjesinde stýdentter 2 jyl boıy ýnıversıtettegi mamandyqtar boıynsha Nazarbaev Zıatkerlik mektebinde tájirıbeden ótedi. Qazir olar ýnıversıtet bitirgen soń úsh tilde (qazaq, orys, aǵylshyn) birden jumys isteýge daıyn.
Óz kezeginde Aqtóbe qalasy fızıka-matematıka baǵytyndaǵy Nazarbaev Zıatkerlik mektebiniń dırektory Sabyrjan Sádýaqasov qazirgi kezde oqytýdyń dýáldy júıesi — tehnıkalyq jáne kásiptik mamandar daıarlaýdyń eń tıimdi joldarynyń biri ekenin aıtyp, seriktes oqý ornynyń jumysyna tabys tiledi.
Munan soń minbede sóz alǵan ýnıversıtettiń Oqý jáne oqý-ádistemelik jumystary jónindegi prorektory, dosent Bıbigúl Ábenova: «Atalmysh shara aıasynda ótkizilgen «Úıren-bólis» jobasynda 300-ge jýyq jastar qatysyp, stýdentter zertteý jobalaryn daıyndaýda bir-birimen ıdeıalar men ınnovasıalardy júzege asyrýdaǵy tájirıbelerimen bólisti. Forýmda Q.Jubanov atyndaǵy Aqtóbe óńirlik memlekettik ýnıversıteti stýdentteri jetistikteriniń kórmesi, plenarlyq jáne seksıalyq májilister, «Úıren-bólis» jobasy, pikirtalastar, ýnıversıtettik týrlar jáne oıyn-saýyq baǵdarlamasy ótti. Sondaı-aq, forým qatysýshylary úshin Nazarbaev Zıatkerlik mektebiniń muǵalimderi sheberlik sabaqtaryn ótkizdi. Munyń barlyǵy ýnıversıtettiń jumysynyń jemisi dep oılaımyn»,- dedi. Sóz sońynda ýnıversıtet prorektory jastardyń jastyq shaqtaryn bos ótkizbeı bilim alyp, sapaly maman bolýǵa shaqyrdy.
Kópshilik aldynda ýnıversıtettiń tehnıkalyq fakúltetiniń túlegi, «Energy Mart» JSHS dırektory Ámir Zıne «Jubanov ýnıversıteti — Qazaqstandaǵy sapaly maman daıarlaıtyn ýnıversıtettiń biri dep aıtar edim. Sebebi, stýdentterge sapaly bilim men sanaly tárbıe berýde ýnıversıtet bazasynda tolyq jaǵdaı jasalǵan. Sondyqtan, stýdentterge aıtarym sizderde qazir bilim alýǵa jaqsy múmkindik bar» , -dedi.
Sondaı-aq, jıynda Nazarbaev Zıatkerlik mektebiniń «Úıren-bólis» jobasyna qatysqan, ýnıversıtettiń «Hımıa» mamandyǵynyń 4-kýrs stýdentteri Aqnur Bımanova men Marfýza Aǵynova óz tájirıbelerimen bólisti.
Aıta keteıik, forýmda «Úıren-bólis» oqý kabınetiniń ashylýy, «Úıren-bólis» jobasy, plenarlyq jáne seksıalyq májilister, pikirtalastar, ýnıversıtettik týrlar jáne oıyn-saýyq baǵdarlamasy uıymdastyryldy.
Sondaı-aq, fızıkalyq-matematıkalyq baǵyttaǵy Nazarbaev Zıatkerlik mektebimen jańartylǵan bilim mazmunyn júzege asyrý maqsatynda 2017 jyldan bastalǵan 3,4 kýrs stýdentterin taǵylymdamadan ótkizýge arnalǵan «Úıren-bólis» jobasy bıyl da júzege asyrylyp otyr. «Úıren-bólis» jobasy bolashaq mamandardyń kásibı qalyptasýynyń kepili retindegi sapaly bilim, ózbetinshe izdenis, ǵylymı-zertteý jobalary, óz ıdeıalaryn júzege asyrý múmkindikteri, jańashyldyq pen kreatıvtilik deńgeılerin kórsetý maqsatynda ótti. «Úıren-bólis» jobasynda «Tepe-teń» dıalog formatyndaǵy oılary, «Tájirıbege baǵyttalǵan bilim» keıs-sheshimder, «Múmkindikter transformasıasy: ıdeıa, nátıje» keıs-sheshimder, «Bolashaq maman: jańashyldyq, shyǵarmashyldyq, mansap» debat formatynda 4 alań jumys jasap, oǵan 300-ge jýyq stýdent qatysty. Onda forým qatysýshylary úshin Nazarbaev Zıatkerlik mektebiniń muǵalimderi arnaıy sheberlik sabaqtaryn ótkizdi. Atalmysh jobada stýdentter zertteý jobalaryn daıyndaýda bir-birimen ıdeıalar men ınnovasıalardy júzege asyrýdaǵy tájirıbelerimen bólisti.
Forým sheńberinde Q.Jubanov atyndaǵy Aqtóbe óńirlik memlekettik ýnıversıtetiniń fızıka-matematıka fakúltetinde «Úıren-bólis» oqý kabıneti qoldanysqa berildi. Kabınettiń ashylýynda rektor Baýyrjan Erdembekov ýnıversıtettegi tyń jańalyqtardy atap óte kele, «Úıren-bólis» oqý kabınetiniń ashylýy sımvolıkalyq jaǵynan respýblıkalyq forýmnyń nátıjeli jumystarynyń biri ekendigin tilge tıek etti. Óz kezeginde «Matematıka» mamandyǵynyń 3-kýrs stýdenti Gaýhar Orazbaqova «Úıren-bólis» oqý kabınetiniń jumysymen tanystyryp, jańartylǵan bilim mazmunynyń erekshelikteri týraly baıandady. Al, fakúltet dekany, dosent Altynshash Bekbaýova fakúltet stýdentteri úshin ádistemelik kabınet bolatynyn jetkizdi.
Qoryta kelgende, Q.Jubanov atyndaǵy Aqtóbe óńirlik memlekettik ýnıversıtetinde ótken forým nátıjesinde jańa dostar, jańa ıdeıalar, jańa múmkindikter paıda boldy. Forýmǵa qatysýshylar óz bilimderimen qatar, tyń ıdeıalaryn belsendi túrde ortaǵa saldy, tájirıbe almasty, pikirtalasqa tústi, qyzyqty máselelerdi talqylady.
Forýmnyń jabylýynda sharaǵa qatysqan Qazaqstannyń joǵary oqý oryndarynyń ókilderine ýnıversıtet rektory, professor Baýyrjan Erdembekov sertıfıkattar tabystady. Elbasynyń «Jastar jyly» aıasynda ótken «Stýdent-Túlek-Maman» respýblıkalyq forýmynyń úndeýi qabyldanyp, forým sońy konserttik baǵdarlamaǵa ulasty.
P.S. Q.Jubanov atyndaǵy Aqtóbe óńirlik memlekettik ýnıversıteti men Nazarbaev Zıatkerlik mektebi joǵary bilikti pedagogtar daıyndaý baǵytynda ózara yntymaqtastyqta qyzmet etýde. Sonyń biri, jańartylǵan bilim mazmuny negizindegi «Úıren-bólis» jobasy aıasynda Nazarbaev Zıatkerlik mektebi Q.Jubanov atyndaǵy Aqtóbe óńirlik memlekettik ýnıversıteti stýdentteri úshin qoldaý kórsetedi. Qazirgi tańda seriktestigimizdiń arqasynda «Fızıka», «Matematıka», «Informatıka», «Bıologıa», «Hımıa» jáne «Shet tilderi» mamandyqtarynyń stýdentteriniń ıntellektýaldy damýyna, jańartylǵan baǵdarlama boıynsha kásibı baǵdarlanýyna, ádiskerlerdiń tájirıbe almasýyna múmkindik jasalýda. Naryq suranysyna sáıkes Q.Jubanov atyndaǵy Aqtóbe óńirlik memlekettik ýnıversıtetiniń bilim berý úderisine 28 mamandyq boıynsha 55 bilim berý traektorıasy engizildi. «Ýnıversıtet-mektep» jobasy aıasynda oblystyq mektepterde 47 fılıal ashyldy. 30 mamandyq boıynsha qosarly bilim berý elementteri engizildi, 29 óndiristik bazada 37 pán ótkizildi. «Fızıka», «Matematıka», «Informatıka», «Bıologıa», «Hımıa» jáne «Defektologıa» mamandyqtary boıynsha kóptildi toptar ashylyp, 32 stýdent bilim alýda.
Sandýǵash BAIǴULQYZY,
Q.Jubanov atyndaǵy Aqtóbe óńirlik
memlekettik ýnıversıteti
Baspasóz qyzmeti
