Бүгін Жұбанов университеті ректоры Б.А.Ердембеков Белоруссиядан келген ғалымдар, Янки Купалы атындағы Гроднен мемлекеттік университетінің физика-математика факультетінің деканы, физика-математика ғылымдарының кандидаты А.Е.Герман, электрхимиялық өлшемдер зертхана меңгерушісі А.Ю.Лицкевичпен кездесті. Кездесуге сондай-ақ, университеттің бірінші проректоры К.Ш.Шүңкеев, физика-математика факультетінің деканы Л.Н.Мясникова және «Нанотехнология» зертханасының меңгерушісі, физика-математика ғылымдарының кандидаты, доцент А.З.Бекешев қатысты.
Кездесу барысында ғылыми-техникалық өнімдерді тасымалдау үшін келісімге келу, Янки Купалы атындағы Гроднен мемлекеттік университеті базасында магистранттардың тағылымдамадан өтуі, студенттердің әлеуметтік-тұлғалық қалыптасулары үшін тәжірибе алмасу мәселелері талқыланды. Кездесу соңында университет ректоры қонақтарға естелікке сыйлықтар табыс етті.
Кездесуден соң шетел ғалымдарының, физика-математика факультеті профессор-оқытушылар құрамы мен студенттері, магистранттардың қатысуымен ынтымақтастықтың болашақ мүмкіндіктері жайында семинар өтті.
