Жұбанов университетінде бүгін студенттердің ғылым апталығы басталды. Әр көктемде өткізілетін дәстүрлі шараның биылғы ұйымдастырылуы ерекше өтуде. Студент-жастардың ғылымдағы талпыныстарына қолдау көрсету, оларды ғылыми ізденістерге қызықтыру мақсатында бір апта ішінде әртүрлі 150-ге жуық шара өткізілетін болады.
Шаралардың көбі ауқымды. Атап өтсек, 12 ғылыми семинар, 16 дөңгелек үстел, 7 тренинг, 28 пәндік олимпиада, 8 ғылыми байқау жоспарланған. Сонымен қатар ғылым апталығы аясында белсенді және үздік студенттер слеті, ғылыми үйірмелер жәрмеңкесі, ғылыми жетістіктер көрмесі, шеберлік сағаттары, брейн-рингтер, іскерлік және интеллектуалдық ойындар сияқты қызықты ғылыми-көпшілік шаралар да бар.
Сондай шаралардың бірі, түстен кейін Қ.Жұбанов атындағы конференц залында басталған «Ғылым қайнары» үздік ғылыми және инновациялық жобалар байқауында 1, 2,3,4 курс студенттері арасынан іріктелген 30 – ға жуық жобалық жұмыстар қаралып жатыр. Жүлделі орын 3-еу. Жеңімпаздар алған орындарына сәйкес 100000, 50000, 25000 теңгемен ақшалай марапатталатын болады.