Мемлекеттік басшысы Қасым-Жомарт Кемелұлы Тоқаев Қазақстан халқына Жолдауында «Халықтың денсаулығын жақсарту мәселесі айрықша назар аударуды талап етеді. Барлық жастағы ел азаматтары арасында бұқаралық спортты дамыту маңызды. Дене шынықтыруды өркендету ісі жаңа чемпиондар шыңына шығатын пирамидаға айналуы тиіс. Бұл салауатты әрі белсенді жастардың, түптеп келгенде, қуатты ұлттың негізін қалыптастырады», — деген болатын. Соған орай, Мемлекет басшысының бастамасын қолдай отырып спорттық инфрақұрылымның барынша қол жетімді болуын қамтамасыз ету үшін Жұбанов университеті жаңа шағын футбол алаңын ашып, спорт кешенін қайта қалпына келтірді. Осы орайда, Жұбанов университетінің ректоры Бауыржан Ердембековтің бастамасымен бүгін оқу ордасы жанынан бой көтерген жаңа типті шағын футбол алаңының ашылу салтанаты болды. 16 мыңнан аса студенті бар оқу ордасында бұрын соңды спорт алаңы болмаған. Бірақ, бұған қарамастан жас спортшылар армандарын жерге тастамай, әлем, азия, республика чемпионаттарында жүлделі орындарға ие болып жүр. Аталмыш нысан Жұбанов университетінде жастар арасында салауатты өмір салтын насихаттау, бұқаралық спорт түрлерін дәріптеу мақсатында ашылып, студенттердің игілігіне берілді. Мұнда студенттер бос уақыттарын тиімді пайдалануға мүмкіндік алады.
Спорт алаңының ашылуына университет ректоры, профессор Бауыржан Ердембеков қатысып, құттықтау сөз сөйледі. «Президентіміз өзінің Жолдауы аясында дене шынықтыру және спортпен айналысуы керектігін атап өткен болатын. Мемлекет басшысының спортқа зор көңіл бөліп, бұл саланы әрдайым мемлекеттік маңызы басым бағыттар санатына қосатындығы қуантады. Міне, соның нәтижесінде саңлақтарымыз үлкен ареналарда ел намысын абыроймен қорғап, көк байрағымызды биіктен желбіретіп жүр. Ақтөбе – футболдың мекені. Біздің футболшыларымыз мықты, жанкүйерлеріміз одан да мықты екенін білесіздер. Сондықтан әлемдік ареналардан көрінетін мықты спортшыларымызды біз дайындау керекпіз деп ойлаймын», — деп, жастарды салауатты өмір салтын ұстануға шақырды.
Алаңның ашылу салтанатында Ақтөбе облыстық футбол федерациясының президенті Асхат Қалжанов, Облыстық дене шынықтыру және спорт басқармасының орынбасары Нұрбол Сыдықовтар сөз сөйлеп, жиналған спорт сүйер қауымды құттықтады. Шағын футбол алаңының ашылуында алғашқы жолдастық кездесу Кәсіби-шығармашылық факультеті мен Экономика және құқық факультеттерінің студенттік командалары арасында өтті.
Айта кетейік, инфрақұрылымды дамытумен қатар Жұбанов университеті спортшы студенттеріне қолдау көрсетеді. Мәселен, осы оқу жылының басында «Дене шынықтыру және спорт» мамандығының 2 студентіне демеушілер есебінен 200 мың теңге көлемінде стипендия, әлеуметтік қолдау мақсатында 1-курс студенттеріне университет есебінен арнайы гранттар бөлінді. Осы жылдар ішінде 2019 жылдың наурыз айында «ARSU League» студенттік шағын футбол құрылған, университеттің ұлттық құрамасы Универсиада чемпионы және студенттер арасындағы Қазақстан чемпионатының күміс жүлдегері атанды.
Жаңа футбол алаңының лентасын профессор Төлеген Ботағариев пен Облыстық дене шынықтыру және спорт басқармасының орынбасары Нұрбол Сыдықов қиды. Университет өнерпаздары би билеп, өлең-жырдың тиегін ағытты. Бұдан соң қонақтар мен университет ұжымы қайта жаңартылған спорт кешені мен бас ғимараттағы көрме залының ашылуына қатысты.
Қайта жаңғыртылған спорт кешенінде студенттердің баскетбол, жеңіл атлетика, тоғызқұмалақ, үстел теннисі, шахмат, волейбол, ату, шаңғы, черлидинг, дзюдо, самбо, бокс және тағы да спорт секциялары жұмыс жасайды. Университетте республикалық, облыстық турнирлер, спорттық және жеңіл атлетикалық турнирлер мен чемпионаттар спорт кешендеріне үнемі өткізіліп тұрады. Ал, жаңадан ашылған көрме залында Кәсіби-шығармашылық факультетінің студенттерінің ең үздік жұмыстарын тамашалауға болады.
Атаулы лента қию рәсіміне Ақтөбе облыстық футбол федерациясының президенті Асхат Қалжанов, Облыстық дене шынықтыру және спорт басқармасының орынбасары Нұрбол Сыдықов, Ақтөбе шығармашылық академиясының директоры Шамшат Жұбай, ҚР суретшілер одағының мүшесі Ахмет Кубай, ҚР суретшілер одағының мүшесі Қайрат Ноғаев, Қалалық суретшілер лицейінің директоры Анастасия Альтина, Облыстық мамандандырылған балалар мен жасөспірімдер спорт мектеп директорының орынбасары Дархан Тажигулов және университет басшылары мен профессорлық-оқытушылық құрамы қатысты.
