Жұбанов университеті мен Heriot –Watt университеті арасындағы серіктестік нығая түсті. Алғашқылардың бірі болып университет ғалымдары Ляззат Тастанова мен Бибігүл Омарова «500 ғалым» бағдарламасы негізінде Heriot –Watt университетіне сегіз ай бойы ғылыми тағылымдамадан өтуге жіберілді.
Осы аралықта олар Heriot –Watt университетінің ғалымдарымен бірге бірлескен зерттеулер жүргізіп, арнайы пәндердің әдістемесін үйренеді.
Математика кафедрасының аға оқытушысы, PhD Бибігүл Омарова: «Эдинбург қаласындағы Heriot-Watt университетінде «Mathematics. Mathematical Analysis (MMA)» бағыты бойынша “Multiperiodic solution of autonomous systems with a differentiation operator in the directions of vector fields” тақырыбында зерттеу жүргізу үшін ғылыми тағылымдамадан өтудемін. Негізгі мақсатым өз зерттеу салам бойынша кәсіби білімімді, біліктілік дағдыларымды тереңдету, шетелдегі озық тәжірибелерді, математикалық зерттеу және есептеу әдістерін зерделеу. Бұл тағылымдама ғылыми-зерттеу жолымдағы жаңа серпіліс болатынына сенімдімін», — дейді.
Ал химия ғылымдарының кандидаты, доцент Ляззат Тастанова «Өнеркәсіптік және тұрмыстық қалдықтарды өңдеу» тақырыбында бірлескен ғылыми-зерттеу жұмыстарын жүргізетін болады.
Айта кетейік, ғылыми тағылымдаманы сәтті аяқтағаннан кейін ғалымдар Жұбанов университеті базасында ашылған Heriot –Watt университетінің филиалында сабақ беріп, тәжірибесімен бөліседі.
