Батыс Қазақстан облыстық қазақ драма театрында ҚР Дін істері және азаматтық қоғам министрі Нұрлан Ермекбаевтың қатысуымен «Дін және ұлттық тарих» тақырыбында республикалық ғылыми-тәжірибелік конференция өтті.
Тарихшы-ғалым Жаңабек Жақсығалиев жүргізген жиынға қатысқан БҚО әкімі Алтай Көлгінов атап өткендей, қоғамда діни ұйымдардың толыққанды қызмет жасауы үшін барлық жағдай бар. Әлеуметтік зерттеулер қорытындысына сәйкес, өңір тұрғындарының 86 пайызы діни ахуалдан хабардар. 200-ден аса адамды біріктірген 14 ақпараттық-түсіндіру тобы белсенді әрекет етуде. «Тұрақтылық кепілі – қауіпсіздік» жобасы аясында 15 мыңнан аса адамды қамтыған 302 шара жүзеге асырылды. Қазіргі таңда «Дін мәселелерін зерттеу орталығы» мекемесінен бөлек, дін саласында 12 үкіметтік емес ұйым жұмыс жасайды.
Елбасының «Болашаққа бағдар: рухани жаңғыру» бағдарламалық мақаласына сәйкес дін саласында да дәстүрлі құндылықтарға басымдық беріліп, кез келген жат ағымға батыл тосқауыл қойылуы тиіс.
Конференцияда сөз алған ҚР Дін істері және азаматтық қоғам министрі Нұрлан Ермекбаев дәстүрлі дүниетанымның маңыздылығын, ал сәләфилік пен уахаббилік секілді ағымдардың Қазақстандағы исламтану үлгісіне мүлдем қиыспайтынын атап көрсетті.
Конференцияда, сондай-ақ Қазақстан мұсылмандары діни басқармасының наиб мүфтиі, бас мүфтидің бірінші орынбасары Серікбай Ораз «Қазақ руханиятын жаңғыртудың жаңа кезеңі», Қ.Жұбанов атындағы Ақтөбе мемлекеттік университетінің профессоры, философия ғылымдарының докторы Амангелді Айталы «Дін және діндарлық: кеше және бүгін», Қожа Ахмет Иассауи атындағы халықаралық қазақ-түрік университеті «Иассауитану» ғылыми-зерттеу орталығының директоры, профессор, философия және теология ғылымдарының докторы Досай Кенжетай «Дін және мәдениет қатынасындағы болмыстық тұжырымдар» тақырыбында баяндама жасады. Басқа да ғалымдар мен мамандар өз ой-толғамдарымен бөлісті.
Нұрлан Ермекбаев өңірге жұмыс сапары барысында сондай-ақ БҚО әкімдігі жанындағы үкіметтік емес ұйымдармен өзара іс-қимыл және ынтымақтастық жөніндегі кеңес отырысына қатысып, оқушы-жастар, зиялы қауым өкілдерімен кездесті.
