Суббота, Июль 20, 2019
Басты > Жаңалықтар > Университетте шығармашылық емтихандар кезеңі басталды

Университетте шығармашылық емтихандар кезеңі басталды

Биылғы талапкерлер университетке түсу үшін  құжаттар тапсырып, оқу жылының басталуын күтуде, ал кейбірі шығармашылық емтиханға қатысып өз бақтарын сынауда. Бүгінгі күні Жұбанов университетінің «Хореография», «Музыкалық білім», «Көркемсурет, көркемдік жұмыс, графика және дизайн», «Дене шынықтыру және спорт» мамандықтары бойынша оқығысы келетіндер үшін емтихандар басталды.

Жастар сарайының оқу кабинеттерінде Кәсіби және шығармашылық факультетінің «Музыкалық білім және хореография» кафедрасының тәжірибелі оқытушыларының комиссиясы 50-ге жуық талапкерді емтиханнан өткізді, олардың 14-і «Хореография» мамандығына тапсырып отыр. «Ең алдымен, шығармашылық пен орындаушылық мүмкіндіктерге қараймыз. Өтінім берушілер өте әртүрлі: базада дайындалғандар бар, биге қызығушылық танытып, шын мәнінде өздерін сынап көргісі келетіндер бар. Қалай болғанда да, олар бізге арнайы келіп отыр, өйткені олар біздің университетіміз бен оқытушыларымызды Ақтөбеде хореографияның негізін қалаушы ретінде біледі. Бүгінгі таңда «Музыкалық білім» мамандығы бойынша 36 талапкер емтихан тапсырып отыр», — деді «Музыкалық білім және хореография» кафедрасының аға оқытушысы, ҚР еңбек сіңірген өнер қайраткері Гүлнар Мамбетова.

Шығармашылық емтиханға ата-аналар да болашақ студенттерді қолдауға келді. «Қызым Гүлдана бірінші сыныптан бастап домбырада ойнады. Музыкаға өте жақын, сондықтан ол музыкамен байланысты мамандықты таңдады. Біз арнайы Байқоңыр қаласынан келген болатынбыз, қызым Жұбанов университетін таңдады», — деді Шакизада Науанова.Айта кетейік, шығармашылық емтихандар бірнеше күн бойы өтеді. «Музыкалық білім» және «Хореография» мамандықтары бойынша 10 шілдеге дейін, «Дене шынықтыру және спорт» мамандығы бойынша  11 шілдеге дейін, ал «Дизайн» мамандығына оқуға қабылданатындар үшін 10-12 шілде аралығында  өздерінің қабілеттерін көрсетеді.