Среда, Август 17, 2022
Басты > Ел жаңалықтары > Президент: ХХІ ғасыр – білім мен біліктің дәуірі

Президент: ХХІ ғасыр – білім мен біліктің дәуірі

Президент Қасым-Жомарт Тоқаев «Тәуелсіздік бәрінен қымбат» атты еліміздің бас басылымы «Egemen Qazaqstan» газетіне жарияланған мақаласында Қазақстанның саяси жүйесі заман талабына сай дамып келе жатқанын тілге тиек етті, — деп хабарлайды Еgemen.kz

«Мәжіліс депутаттарының биылғы сайлауы – көппартиялы Парламентті орнықтыру жолындағы маңызды қадам. Бізде саяси көзқарастары әртүрлі партиялар бар. Олардың ұстанымдары консервативті, либералды, ұлтшыл, социалист және тағы басқа болуы мүмкін. Бұл – табиғи үдеріс. Саяси плюрализм мемлекетті эволюциялық жолмен дамытуға және нығайтуға мүмкіндік береді. Саяси күштер осындай әралуан болса да, баршасын біріктіретін және бәріне ортақ құндылық бар. Ол – қастерлі Тәуелсіздік», — дейді Мемлекет басшысы.

Осы тұста Президент алдағы мақсат келер ұрпаққа Қазақстанды тұғыры мығым, экономикасы қуатты, рухы асқақ мемлекет ретінде табыстау және елдік істерді шашау шығармай лайықты жалғастыратын жасампаз ұрпақ тәрбиелеу екенін баса айтты.

«ХХІ ғасыр – білім мен біліктің дәуірі. Әр адам өзін үздіксіз жетілдіріп, жаңа кәсіптерді игеріп, үнемі заман ағымына бейімделу арқылы ғана бәсекелік қабілетін арттыра алады. Білім мен технология, жоғары еңбек өнімділігі ел дамуының басты қозғаушы күші болуға тиіс. Бұл туралы ұлы Абай: «Адам баласы адам баласынан ақыл, ғылым, ар, мінез деген нәрселермен озбақ. Онан басқа нәрсеменен оздым ғой демектің бәрі де – ақымақтық» деген», — деп нақтылап өтті Мемлекет басшысы.

 

egemen.kz