Филиалда студенттер қазақ, орыс және ағылшын тілдерінде білім алады.
Ғылым және жоғары білім министрлігі Ашық НҚА порталында Ақтөбеде Ұлыбритания және Солтүстік Ирландия Біріккен Корольдігінің Heriot-Watt университетінің филиалын құру туралы Үкімет қаулысының жобасын жариялады.
Heriot-Watt филиалы Жұбанов атындағы Ақтөбе өңірлік университетінің базасында жұмыс істейді.
Қаулы жобасына сәйкес, филиалда студенттер Heriot-Watt университеті мен Жұбанов университетінің аккредиттелген білім беру бағдарламалары негізінде білім алады. Оқу процесі мемлекеттік, ағылшын және орыс тілдерінде ұйымдастырылады.
«Шетелдік профессорлық-оқытушылық құрамның филиалдың жалпы профессорлық-оқытушылық құрамындағы үлесі 30 пайызды құрайды. Филиалды қаржыландыру Қазақстанның мемлекеттік білім беру тапсырысы шеңберінде алынған қаражат және Қазақстан заңнамасында тыйым салынбаған өзге де көздер есебінен жүзеге асырылады», – делінген құжатта.
Еске салайық, бұған дейін Жұбанов атындағы Ақтөбе өңірлік университетінің ректоры Лаура Қарабасова 2023-2024 оқу жылына мемлекеттік грант негізінде 300 студент Heriot-Watt университетінің филиалына келесі мамандықтар бойынша қабылданатынын хабарлаған болатын:
Электр энергетикасы (ҰБТ-дағы бейіндік пәндері – математика-физика);
Геоинженерия (бейіндік пәндер – математика-физика);
Компьютерлік инженерия (бейіндік пәндер – математика-информатика).
//informburo.kz/
