Бүгін білім мен ғылымның іргелі ордасының ажарын айшықтай түскен күн болды. Аулаға тігілген әсем киіз үй, қазанда қайнаған наурыз көже, иісі бұрқыраған бауырсақ, қазақы нақышта киінген университеттің профессор-оқытушылары, қызметкерлері мен білім алушылары –этнотимбилдингтің керемет көріністері болды.
Жұбанов университетінде Ұлыстың ұлы күні – Наурыз мейрамын тойлау басталып кетті. Оқу орнының барлық ғимаратында да мерекелік көңіл күй орнады. Университет Басқарма төрағасы-ректор Лаура Қарабасова әр факультетті аралап, ұлтымыздың ұлық мерекесімен құттықтады.
Наурыз мейрамына арналған концерттік бағдарлама мерекенің сәнін аша түсті. Сондай-ақ, қазақ халқының салт-дәстүрлерінен сыр шертетін ұлттық ойындар ойнатылды. Жиналғандар арқан тарту, гір көтеру, қол күресі секілді ойындарға қатысып, жүлдегерлерге сыйлықтар берілді.
Сонымен қатар дастарқандағы ас мәзірінен ауыз тиіп, бір-біріне жақсы тілектер айтылды.
Көрісу күнінде Наурыз мейрамы тағылым мен тәрбиенің қарашаңырағында ерекше сән-салтанатымен атап өтілді.
